ഭയവും മരണവും മയക്കുന്നതാരെ . .?

ഭയവും മരണവും കേരളത്തിൻ്റെ   ഇടവഴികളിൽ തോളിൽ കയ്യിട്ടു നടക്കുകയാണ് . അവരുടെ വഴികളിൽ തൽക്കാലം ചെറിയ തടസങ്ങൾ മാത്രം .  നിയമം അവർക്കൊരു പ്രതിസന്ധിയോ  ചെറുതടസമോ അല്ല .   അവരുടെ വഴികൾക്ക്  അനുകൂലമായ മനസും ജീവിത ഘടനയും മലയാള സംസ്‌കൃതി കയ്യെത്തിപ്പിടിച്ചിരിക്കുന്നു . ആത്മവിശ്വാസത്തോടെ അവരോട്  തടസം പറയാൻ ആരുമില്ലാതായിരിക്കുന്നു .  ഏറ്റവും അനാഥമായ ഒരു സമൂഹമായി കേരളീയ ജീവിതത്തെ പരിവർത്തനം ചെയ്തെടുത്തത്  ആരാണ് . ..?

കേരളത്തിലെ സംഘടനകൾ . 

ഇത്രയധികം രാഷ്ട്രീയവും സാമൂഹികവും മതപരവും സാമുദായികവുമായ  സംഘടനകൾ നിറഞ്ഞ ഒരു സമൂഹം ലോകത്ത് ഒരിടത്തും കാണില്ല . എല്ലാവരും സംഘടിതരാണ് .

ആദിവാസികൾ ഒഴികെ . 

എല്ലാവർക്കും  സംഘടനകൾ നൂറായിരം ഉണ്ട് .  പ്രധാന മത വിഭാഗമായ ഹിന്ദുക്കൾക്കിടയിൽ  ഓരോ ജാതിക്കുമുണ്ട് സംഘടനകൾ . ഒരു ജാതിയിൽത്തന്നെ  അനേകം സംഘടനകൾ . അതിൻ്റെ  ഉപവിഭാഗങ്ങളായി  ബാലകർ മുതൽ വയോവൃദ്ധർ , സ്ത്രീകൾ എന്നിവർ അണിനിരക്കുന്നു . എല്ലാ ദിവസവും പരസ്പരം ബന്ധപ്പെടേണ്ടി വരുന്ന വിധം ദൈനം ദിന പ്രവർത്തനങ്ങൾ ,വാട്സാപ്പ് ഗ്രൂപ്പുകൾ , പ്രാർത്ഥനാ ഗ്രൂപ്പുകൾ , കുടുംബ യൂണിറ്റുകൾ, വിവാഹ - മരണ സംഘങ്ങൾ . 

ക്രൈസ്തവർക്കിടയിൽ  വിവിധ  സഭകളിലായി നൂറുകണക്കിന് സംഘടനകൾ . ജനനം മുതൽ മരണം വരെ മനുഷ്യരെ പിന്തുടരുന്ന ക്രൈസ്തവ മതത്തിൻ്റെ ഓരോ സഭയ്ക്കും  വിവിധ കാര്യങ്ങൾക്കായി സംഘടനാ സംവിധാനങ്ങൾ ഉണ്ട് . അതിൻ്റെ  വേലിക്കെട്ടിന്‌  പുറത്ത് ജീവിക്കുന്ന  മനുഷ്യർ  അത്യപൂർവ്വമാണ് .പൗരോഹിത്യ സംവിധാനത്തിൻ്റെ നേതൃത്വത്തിൽ ആശുപത്രികൾ , സ്‌കൂളുകൾ ,കോളേജുകൾ  തുടങ്ങി എത്രയോ സ്ഥാപനങ്ങൾ . 

കേരളീയ മുസ്ലീങ്ങൾക്കിടയിലാണ് ഏറ്റവും കൂടുതൽ സംഘടനകൾ ഉള്ളത് .  ആത്മീയത മുതൽ  രാഷ്ട്രീയം വരെയായി എണ്ണിയാലൊടുങ്ങാത്ത സംഘടനകൾ,സ്ഥാപനങ്ങൾ ,സ്കൂളുകൾ കോളേജുകൾ എല്ലാമുണ്ട് . വ്യക്തിയുടെ ജീവിതത്തിൽ ക്രൈസ്തവ സഭ ഇടപെടുന്നപോലെ ഇടപെടുവാൻ  ശേഷിയുള്ള ഒരു പൗരോഹിത്യം ഇല്ലെങ്കിലും ഒറ്റയ്‌ക്കൊറ്റയ്ക്ക്  സുഘടിതമാണ് ഈ സംഘടനകളും .   ഇസ്‌ലാം മതം ഉപേക്ഷിച്ചവർ പോലും സംഘടന ഉണ്ടാക്കിയിട്ടുണ്ട് . 

അതിനും വെളിയിൽ യുക്തിവാദികളുടെ , നിരീശ്വരരുടെ സംഘടനകൾ .  അതിനും വിവിധ അവാന്തര വിഭാഗങ്ങൾ പ്രവർത്തിക്കുന്നു . 

അത്രയും തന്നെ സജീവമാണ് ദലിത്  പരിപ്രേക്ഷ്യങ്ങളോടെ പ്രവർത്തിക്കുന്ന  സംഘടനകളും വ്യക്തികളും . മറ്റ്  സംഘടനാ സംവിധാനങ്ങൾ പോലെ  സുഘടിതമോ  സാമ്പത്തിക ചുറ്റുപാടുകളോ ഇല്ലെങ്കിലും സാമൂഹിക ജീവിതത്തിൽ ഇവരുടെ  സാന്നിധ്യവും  പ്രകടമാണ് കേരളത്തിൽ . 

നമുക്ക് ഒന്നിൻ്റെയും കുറവില്ലല്ലോ . 

രാഷ്ട്രീയ പാർട്ടികൾ / മുന്നണികൾ . 

പുതുതായി നാലോ അഞ്ചോ  മുന്നണികൾ ഉണ്ടാക്കാൻ  പറ്റുന്ന വിധം   എണ്ണത്തിൽ   ഒരുപാടുണ്ട്   കേരളത്തിലെ രാഷ്ട്രീയ പാർട്ടികൾ . ഇന്ത്യയിലെ 95 ശതമാനം രാഷ്ട്രീയപാർട്ടികൾക്കും കേരളത്തിൽ യൂണിറ്റുകൾ ഉണ്ട് .  പ്രധാന മുന്നണികൾ  രണ്ടാണെങ്കിലും മൂന്നാം സ്ഥാനത്തേക്ക് മത്സരിക്കുന്ന ഒരു മുന്നണിയും  കേരളത്തിൽ സജീവമാണല്ലോ .  ഇവയുടെ ബലാബലത്തിൽ  അധികാരം ഇവരിൽ ആരെങ്കിലും പങ്കുവയ്ക്കുന്നു .  ഓരോ മുന്നണിയിലും കുറഞ്ഞത് 10  പാർട്ടികൾ എങ്കിലുമുണ്ട് .  ഓരോ രാഷ്ട്രീയ പാർട്ടിക്കും മതങ്ങൾക്കുള്ളതുപോലെ  പ്രായം,തൊഴിൽ  , ലിംഗം , സമുദായം എന്നിവയുടെ അടിസ്ഥാനത്തിൽ ഉപ വിഭാഗങ്ങൾ വെള്ളംചോരാത്ത വിധം ചേർന്ന് നിന്ന് പ്രവർത്തിക്കുന്നു . 

കിട്ടിയ  അധികാരം  തൃപ്തികരമായി പങ്കുവച്ച്  വളരുകയാണ് നമ്മുടെ രാഷ്ട്രീയ പാർട്ടികൾ . കൂടെ നിൽക്കുന്നവർക്കായി എന്തും  ചെയ്യും എന്ന സഹായ മനഃസ്ഥിതി ഉള്ളതിനാൽ  കാര്യസിദ്ധ്യർത്ഥം  ജാഥകളിൽ എല്ലാവരും അണിനിരക്കുന്നുണ്ട് .  ജാഥകളിലും സമരങ്ങളിലും ശക്തി കാണിക്കുന്ന കാര്യത്തിൽ ഒരു പാർട്ടിയും പിന്നോട്ട് പോകാറില്ല എന്നത് കേരളത്തിൻ്റെ സവിഷേതകളിൽ ഒന്നാണ് . 

നമുക്ക് എന്തിൻ്റെ  കുറവാണുള്ളത് . ..?

മാനസിക പശ്ചാത്തലം . 

ലോകത്ത് എല്ലായിടത്തും  ജീവിതം കണ്ടെത്തിയ മലയാളിക്ക് ലോകത്തിലെ ഒന്നും ഇതുവരെ അന്യമായിട്ടില്ല . ലോകത്തിൻ്റെ ഏത് മൂലയിലെ സംഭവത്തിനും ഇവിടെ പ്രതികരണങ്ങൾ ഉണ്ടാകാറുണ്ട് .  സദ്ദവും ഹുസൈനു വേണ്ടി ഒരു ഹർത്താൽ തന്നെ നമ്മൾ നടത്തിയിട്ടുണ്ട് . ഗാസയ്ക്കും ക്യൂബയ്ക്കും ടിയാനെൻമെൻ  സ്ക്വയറിനും  നമ്മൾ ഐക്യദാർഢ്യം  പ്രഖ്യാപിച്ചിട്ടുണ്ട് . 

 അന്യദേശങ്ങളെ  തൊഴിലിനും സാമ്പത്തിക പര്യാപ്തതയ്ക്കുമായി  ആശ്രയിക്കുന്ന ഒരു സമൂഹത്തിൽ ഇത് അസാധാരണമല്ല . കൂടാതെ  ഏറ്റവും കൂടുതൽ സാക്ഷരതയും , സാമാന്യമായി ലഭ്യമാകുന്ന വിദ്യാഭ്യാസ സാഹചര്യങ്ങളും ഏറ്റവും കയറ്റുമതി ചെയ്യാൻ പാകത്തിലുള്ള തൊഴിൽ ശേഷിയെ ഇവിടെ സൃഷ്ടിച്ചിട്ടുണ്ട് . എല്ലാ കാര്യങ്ങളെക്കുറിച്ചും ഒരു മലയാളിക്ക് എന്തെങ്കിലും പറയാനുണ്ടാകും . എല്ലാ മുലകളിലും ചുരുങ്ങിയത് ഒരു നൂറ്  പണ്ഡിതർ സന്നിഹിതരാണ് . 

മാധ്യമങ്ങൾ . 

മാധ്യമ സാന്ദ്രത കൊണ്ടും കേരളം സമ്പുഷ്ടമാണ് . എത്രയോ  പത്രങ്ങളും ചാനലുകളും , മാസികകളും നമുക്കുണ്ട് .  എല്ലാ മതങ്ങൾക്കും , രാഷ്ട്രീയ പാർട്ടികൾക്കും പത്രവും ചാനലും  ഉണ്ട് .  എന്നിട്ടും  ഏറ്റവും കൂടുതൽ വിറ്റഴിയുന്നതും ,  കാഴ്ചക്കാരുള്ളതും   സ്വകാര്യ ഉടമസ്ഥതയുള്ള  പത്രങ്ങളും ചാനലുകളും ആണ് . രാപകൽ സമരം മാത്രമല്ല ,  ചാനൽ ജീവിതവും ഒരുപക്ഷെ ലോകത്തിൽ മലയാളിക്ക് മാത്രമാണ് ഉണ്ടാവുക . 

പോരാത്തതിന്  പാതിരാത്രിയായാൽ  ചാനലുകളെല്ലാം പ്രത്യേകം ക്രിമിനൽ സംഭവങ്ങളുടെ പ്രത്യേക പരിപാടികളും സംപ്രേക്ഷണം ചെയ്യുന്നുണ്ട് .  നമ്മളെ അവർ അറിവുള്ളവർ ആക്കുകയാണല്ലോ . 

നമുക്കെന്തെങ്കിലും .കുറവുണ്ടോ . ?

സമകാലികം . 

രണ്ട്  സമകാലിക ദുരന്തങ്ങൾ  മലയാളികളുടെ മാനസിക പരിസരത്തെ വേട്ടയാടുകയാണ് .  അതിൽ ഒന്നാമത്തേത് യുവജനങ്ങളുടെ വർധിച്ച തോതിലുള്ള കുടിയേറ്റമാണ് .  കേരളത്തെ ഒരു വാർധക്യ സംസ്ഥാനമായി പരിവർത്തനപ്പെടുത്താനുള്ള ഉള്ളടക്കം അതിലുണ്ട് . 

മറ്റൊന്ന്  മയക്കു മരുന്നും അതിൻ്റെ  അനുബന്ധമായി രൂപപ്പെടുന്ന ക്രിമിനൽ പ്രവൃത്തികളുമാണ് .  എല്ലാ ദിവസവും എന്നവണ്ണം  അതിൻ്റെ  രൂപവും ഭാവവും കരാളമാകുന്നത് ഞെട്ടലോടെയാണ് മലയാളികൾ കണ്ടുനിൽക്കുന്നത് . ഇത്രയും ഹിംസാത്മകത എങ്ങിനെ നമ്മളിലേക്ക് പടർന്നുകയറി എന്ന് അന്ധൻ ആനയെക്കണ്ടപോലെ  നമ്മൾ വിവരിച്ചു വിയർക്കുകയാണ് . 

പോം വഴിയിലേക്ക് നമ്മൾ എത്തുമോ . .?

ഒരു പ്രതിസന്ധിയെ അതിൻ്റെ ആഴത്തിലും പരപ്പിലും കണ്ടറിയാനും വസ്തുതകളെ അംഗീകരിക്കാനും കഴിയുമ്പോൾ മാത്രമല്ലേ അതിനെ മറികടക്കാനുള്ള വഴികൾ തെളിയൂ . 

ഇത്രയേറെ സംഘടിതരായി മലയാളികൾ , 

അതിൻ്റെ പേരിലുള്ള അഹന്തകളിൽ ലോകോത്തരമായ അഹന്ത സൂക്ഷിക്കുന്ന നമ്മൾ !

എങ്ങനെയാകും ഈ പ്രതിസന്ധിയെ നേരിടുക ? മറികടക്കുക ?

ചില ചോദ്യങ്ങൾ  എല്ലാവരുമായി പങ്കുവയ്ക്കുവാൻ  "യരലവ" ആഗ്രഹിക്കുന്നു . 

1) ഇത്രയേറെ സംഘടിതരും സുഘടിതരും ആയിട്ടും എങ്ങിനെയാണ് മയക്കുമരുന്ന് നമുക്കിടയിൽ , ചെറു കുട്ടികൾക്കുപോലും ലഭ്യമാകുന്ന വിധത്തിൽ പടർന്നത് . .?

2 )  വെറും വാറ്റു ചാരായവും പൊതിക്കഞ്ചാവും പിടിക്കാൻ മാത്രം പരിശീലിക്കപ്പെട്ട നമ്മുടെ എക്സൈസ്/ പോലീസ് സംവിധാനങ്ങൾക്ക് ഏറ്റവും ആധുനികമായ സാങ്കേതിക സംവിധാനങ്ങൾ  ഉപയോഗിക്കുന്ന മയക്കുമരുന്ന് മരണവ്യാപാരികളെ  നേരിടാൻ കഴിയുമോ . .?

3)  ലഘുവായ ശിക്ഷകളും ,കർശനമായ നടപടിക്രമങ്ങളും മൂലമല്ലേ  മയക്കുമരുന്ന് കേസിലെ പ്രതികൾ രക്ഷപ്പെടുന്നത് ? 

4 )  ശിക്ഷിക്കപ്പെടുന്നു  എന്ന് പറയുന്ന കേസുകളിൽ വെറും പിഴശിക്ഷയല്ലേ ചുമത്തിയിരിക്കുന്നത് . .? ഇത് എന്തുതരം സഹായമാണ്  മയക്കുമരുന്ന് സംഘങ്ങൾക്ക് നൽകുന്നത് . .?

5 )   ഈ അവസ്ഥയെ നേരിടാൻ നമ്മുടെ പരമ്പരാഗത രാഷ്ട്രീയ സൂത്രപ്പണികളായ ,  ബോധവൽക്കരണം , പദയാത്ര , ധർണ , പിക്കറ്റിങ് , പ്രതിജ്ഞ , ചങ്ങല , മതിൽ  , എന്നിവയ്ക്ക് സാധ്യമാണോ . ?

6 )  അത്തരം പരിഹാസ്യമായ  പരിപാടികൾ  മയക്കുമരുന്ന് വ്യാപാരത്തിന്  ഗുണമല്ലേ ചെയ്യുക . .?

7 )  കേരളത്തിലെ രാഷ്ട്രീയ അധികാരത്തിൻ്റെ യും  ഔദ്യോഗിക സംവിധാനങ്ങളുടേയും  അറിവില്ലാതെ ഇത്രയും വ്യാപകമായ വിധത്തിൽ സർവനാശ സ്വഭാവത്തിൽ  മയക്കുമരുന്ന് സംഘങ്ങൾക്ക്  വളരാൻ കഴിയില്ല എന്ന  ആശങ്ക ശരിയാണോ . .?

8 ) പിടിക്കപ്പെടുന്ന മയക്കുമരുന്നുകൾ തന്നെ പതിനായിരക്കണക്കിന് കോടി രൂപയുടേതാണ് . അപ്പോൾ പിടിക്കപ്പെടാതെ പോകുന്നത് അതിലും എത്രയോ  ആയിരിക്കും .  ഇത്രയേറെ തുക മുടക്കി വ്യാപാരം നടത്തുന്നവർ  ആരുടേയും സംരക്ഷണമില്ലാതെ അതിനു തുനിയുമോ ...? ആരാണ്  ഈ വലിയ കച്ചവടക്കാർ . .?

9) ആരായിരിക്കും അവരുടെ സംരക്ഷകർ എന്നാണ്  നിങ്ങൾ കരുതുന്നത് . .?

10) ഞങ്ങളറിയാതെ കേരളത്തിൽ ഒന്നും നടക്കില്ല എന്ന സംഘടനകളുടെ വീരവാദങ്ങളെ നിങ്ങൾ  എങ്ങനെ കാണുന്നു . .? 

ഈ  ചോദ്യങ്ങളിൽ നിന്നും ഓരോ  മലയാളിയുടേയും  ഉത്തരം രൂപപ്പെടുകയും ,

ആ ഉത്തരങ്ങളിൽ നിലപാടുകൾ ഉണ്ടാവുകയും ചെയ്യുമ്പോഴല്ലേ 

നമ്മളെ ചുറ്റി വിരിയുന്ന ഭയവും മരണവും  അകന്നുപോവുക . ..?

വെളിവുള്ള പിള്ളേർ നാടുവിടുകയും , 

ബാക്കിയുള്ളതിൽ കുറേപ്പേർ മയക്കുമരുന്നിനാൽ അടിഞ്ഞു പോവുകയും ,

കുറേപ്പേർ കൊല്ലപ്പെടുകയും, ബാക്കിയുള്ളവർ ഹിംസയിൽ ആഹ്ളാദിക്കുകയും ,

പിന്നെയും ബാക്കിയുള്ളവർ  ഭയത്താൽ ഒതുങ്ങുകയും ചെയ്യുന്ന

ഒരു കേരളമാണോ നമ്മളെ കാത്തിരിക്കുന്നത് . ..?

നിങ്ങളുടെ ഉത്തരങ്ങളും "യരലവ"  യെ അറിയിക്കുക .

നമ്മുടെ അന്വേഷണം തുടരാം . 

മറക്കാതിരിക്കാൻ   ഒരു കാര്യം സൂചിപ്പിക്കാം . 

നമ്മുടെ ചെറുപ്പക്കാർ ഇപ്പോൾ രാസലഹരി സ്വയം നിർമ്മിച്ചു തുടങ്ങിയതായി റിപ്പോർട്ടുകൾ ഉണ്ട് . 

ആത്മഹത്യയ്‌ക്കും കൊലയ്ക്കും ഇടയിൽ നമുക്ക് സംഭാഷണങ്ങൾ തുടരാം . 

അടുത്ത ലക്കത്തിൽ തുടരും . ......,