കാലോ ഹരിൺ -ഐ . എം .വിജയൻ
കാലോ ഹരിൺ
പുള്ളിമാൻതുള്ളുന്ന ഭംഗിയിൽ ഇന്ത്യൻ മൈതാനങ്ങളെ അവിസ്മരണീയ ഓർമകളിലേക്ക് വഴിനടത്തിയ തൃശൂർക്കാരൻ അയനിവളപ്പിൽ മണി വിജയൻ അഥവാ ഐ.എം. വിജയൻ വീണ്ടും വാർത്തകളിൽ നിറഞ്ഞത് ഈ റിപ്പബ്ലിക് ദിനത്തിലാണ്. കാലോ ഹരിൺ എന്ന് പേരിട്ട് കളിക്കളങ്ങളും ഇന്ത്യയിലെ ഫുട്ബോൾ ആരാധകരും അംഗീകരിച്ചെങ്കിലും രാജ്യം ഈ പ്രതിഭയെ ആദരിക്കുന്ന കാര്യത്തിൽ ഏറെ വൈകി എന്ന സത്യം ആർക്കും നിഷേധിക്കാൻ ആവില്ല.
വൈകി എങ്കിലും എത്തിച്ചേർന്ന അംഗീകാരത്തെ രാജ്യത്തെ ഫുട്ബാൾ ആരാധകർക്ക് സമർപ്പിച്ച് ഐ . എം . വിജയൻ എന്ന ഇതിഹാസം വിനയം പ്രകടിപ്പിക്കുന്നതും നമ്മൾ കണ്ടു . തന്നെക്കാൾ ഇളയവരായ പ്രതിഭകൾക്ക് രാജ്യം അംഗീകാരം നൽകുമ്പോഴും അതിനോട് ഒരിക്കലും കലഹിക്കാതെ കടന്നുപോയി എന്നതും വിജയൻ്റെ ജീവിത മര്യാദകളാണ് .
ജീവിതത്തിൻ്റെ കഠിനതകളിലൂടെ വളർന്നുവന്ന വിജയന് ഫുട്ബാൾ പ്രത്യാശയും വിമോചനവും ആയിരുന്നു . അതിനാൽ മറ്റൊന്നും വിജയനെ പിന്നോട്ടടിപ്പിച്ചില്ല . കളിക്കളങ്ങൾക്കും അപ്പുറം മറ്റൊന്നും വിജയനെ പ്രചോദിപ്പിച്ചില്ല .
അന്തർ ദേശീയ ഫുട്ബോളിൽ ഏറ്റവും കുറഞ്ഞ നേരത്തിനുള്ളിൽ ഹാട്രിക്ക് നേടിയ വിജയൻ്റെ റെക്കോർഡ് ലോകത്ത് ഇന്നുവരെ ആരും മറികടന്നിട്ടില്ല . 1999ലെ സാഫ് ഗെയിംസിൽ ഭൂട്ടാനെതിരെ പന്ത്രണ്ടാം സെക്കന്റിൽ ഗോൾ നേടി ഏറ്റവും വേഗത്തിൽ ഗോൾ അടിച്ച കളിക്കാരനായി . പാക്കിസ്ഥാനെതിരായ മത്സരത്തിലാണ് ഏറ്റവും വേഗമുള്ള ഹാട്രിക് നേടിയത് . 1992 ,1997 ,2000 വർഷങ്ങളിൽ ഇന്ത്യയിലെ ഏറ്റവും നല്ല ഫുട്ബോളർ ബഹുമതി നേടി . 2003 ൽ ആണ് അർജ്ജുന അവാർഡ് നേടിയത് . വിജയനെക്കാൾ ജൂനിയർ ആയ ബെയ്ച്ചിങ് ബൂട്ടിയക്ക് 1998 തന്നെ അർജുനയും 2008 ൽ പത്മശ്രീയും ലഭിച്ചിരുന്നു എന്ന കാര്യം നമ്മൾ മലയാളികൾ മറക്കേണ്ടതില്ല .
2025 ൽ ഐ . എം . വിജയനെ തേടിയെത്താൻ പദ്മശ്രീ പുരസ്കാരത്തിന് കഴിഞ്ഞത് ആ പുരസ്കാരത്തിന് തന്നെയാണ് നേട്ടമായത് .
"ഞാൻ എത്ര മികച്ച കളിക്കാരനാണെന്ന് എനിക്കറിയില്ല , ഫുട്ബാൾ പ്രേമികളിൽ നിന്നും എനിക്ക് ലഭിച്ച സ്നേഹം തന്നെയാണ് എനിക്ക് ലഭിച്ച ഏറ്റവും വലിയ നേട്ടം ,എൻ്റെ ഫുട്ബോളിനെ ഈ നിലയിലേക്ക് വളർത്തിയെടുത്തത് അവരാണ് . " എന്ന വാക്കുകളിൽ വിജയൻ തൻ്റെ ജീവിത വീക്ഷണം മനോഹരമായി വരച്ചിടുന്നുണ്ട് .
മലയാളികൾക്ക് മാത്രമല്ല ഇന്ത്യൻ ഫുട്ബോളിന്റെയും അഭിമാനമാണ് ഐ . എം . വിജയൻ . 72 അന്തർദേശീയ മത്സരങ്ങളിൽ നിന്നും 29 ഗോളുകൾ നേടിയ വിജയൻ തന്റെ ഫുട്ബോൾ സ്വപ്നമായ അക്കാഡമിയുടെ സാക്ഷാൽക്കാരത്തിനായി പ്രയത്നിച്ചുകൊണ്ടിരിക്കുന്നു . കേരള ഫുട്ബോൾ ഇനിയും വിശാലതകളിലേക്ക് സഞ്ചരിക്കാൻ ഉറപ്പായും വിജയൻ്റെ സേവനങ്ങളും ഉണ്ടാകും .
What's Your Reaction?